Habari
MBWASI: MNYORORO BARIDI (COLD CHAIN) NI MSINGI WA KULINDA UBORA WA BIDHAA ZA TANZANIA KATIKA MASOKO YA NJE
Kilimanjaro
Naibu Katibu Mkuu wa Wizara ya Viwanda na Biashara, Bw. Aristides Mbwasi, amesisitiza umuhimu wa kudumisha mnyororo baridi ili kulinda ubora wa mazao yanayoharibika haraka, kuanzia yanapovunwa shambani hadi yanapomfikia mnunuzi wa nje.
Mbwasi amesema dosari ndogo katika udhibiti wa joto wakati wa kuhifadhi au kusafirisha mazao inaweza kusababisha mnunuzi kukataa shehena nzima.
Bw. Mbwasi amesema hayo Novemba alipotembelea kituo cha mizigo cha Swissport katika Uwanja wa Ndege wa Kimataifa wa Kilimanjaro (KIA), ambako amejionea jinsi shehena zinavyopokelewa, kuhifadhiwa kwenye vyumba vya baridi na kupakiwa kwa ajili ya kusafirishwa kwa ndege.
Ameeleza kuwa kituo hicho ni kiungo muhimu kati ya wazalishaji wa Tanzania na masoko ya nje, kwa kuwa kinasaidia mazao kuwafikia wanunuzi kwa wakati na yakiwa na ubora unaohitajika.
Katika mnyororo huo, Mamlaka ya Maendeleo ya Biashara Tanzania (TanTrade) inawaunganisha wazalishaji na wanunuzi wa nje kupitia maonesho na mikutano ya kibiashara, ambako wanajadili ubora wa mazao, kiasi kinachohitajika na muda wa kuyawasilisha. Kupitia kliniki za biashara, TanTrade pia huwasaidia wazalishaji kuelewa mahitaji ya masoko wanayolenga na kujiandaa kuyakidhi.